4 drug suspek patay sa shootout
MANILA, Philippines — Apat na lalaki ang napatay nang ito ay makipagbarilan sa mga pulis na magsisilbi ng arrest warrant kamakalawa ng gabi sa Opol, Misamis Oriental.
Ang mga napatay na suspek ay kinilalang sina Nelson Manlos, alyas Boyong; Almirante Teneza, Jony Gacrama at Arman Gutierez.
Ayon kay Police Major Evary Bacunawa, hepe ng Opol Municipal Police Station, pasado alas-11:00 ng gabi ay tinungo ng pulisya ang bahay ni Manlos sa Vamenta Subdivision sa Barangay Barra para isilbi ang arrest warrant nito sa kasong paglabag sa Republic Act No. 9165 o Comprehensive Dangerous Drugs Act.
Papalapit pa lamang ang pulisya ay pinagbabaril ang mga ito ng mga kasama ni Manlos na sina Teneza, Gacrama at Gutierez, dahilan para gumanti rin ang mga otoridad at napatay ang mga ito.
Narekober sa mga suspek ang 2 kalibre .38 na revolver, 2 hand grenade, at 7 sachet ng hinihinalang shabu.
Itinuturing umanong ika-3 “most wanted” sa Opol si Manlos.
- Latest
