Itinago sa children’s books... 3 courier ng cocaine tiklo sa NBI

MANILA, Philippines — Naaresto ng mga ­operatiba ng National Bureau of Investigation (NBI) ang tatlong katao na nagsabwatan para ibiyahe ang nasa 3 kilo ng cocaine na nakalagay sa loob ng mga children’s books.

Isiniksik ang cocaine sa harap at likod na pabalat ng limang aklat at naniniwala ang NBI na ito ay dadalhin sa Bangkok mula Brazil via Manila.

Ang naarestong suspek na si Ma. Clara Bedico, ang may dalang bag na naglalaman ng mga libro at bumaba noong March 28, at nagpunta sa isang fast food restaurant malapit sa Ninoy Aquino International Airport Terminal 3 upang katagpuin ang isang Alvin Avila, na tutulong para i-rebook ang kanyang biyahe.

Kaya’t agad nagtungo ang NBI special action agents na nakipagtulu­ngan sa drug enforcement operatives sa restaurant at inaresto ang dalawa at napansin na kakaiba ang bigat ng mga libro kaya’t pinunit ito at nakita ang mga puting pulbos at nang suriin sa laboratoryo ay nagpositibo na cocaine.

Naaresto sa isang follow-up kinabukasan sa Pasig City ang kasama nina Bedico at Avila na si Antonette Mendiola.

Malaki ang paniniwala ng NBI na na-recruit ang tatlo ng Western African Drug Syndicate, sa pamamagitan ng advertisements sa Facebook na magdedeliber ng mga alahas na hindi nila alam na droga ang kanilang ibabiyahe.