Gensan bomber dedo sa drug bust
MANILA, Philippines — Napatay ng mga otoridad ang isa sa bomber ng GenSan noong Setyembre 16 sa isang drug buy bust operation kamakalawa sa Barangay Glamang, Polomolok, South Cotabato.
Ang nasawing suspek ay kinilalang si Samrud Embang, 22 at residente ng Brgy. Lapu, Polomolok South Cotabato.
Bago ang drug operation dakong alas-4:00 ng hapon ay natunugan ng suspek na isang pulis ang kanyang katransaksiyon sa droga kaya’t bumunot ng baril at binaril ang nasabing pulis na maswerteng hindi tinamaan.
Gumanti ng putok ang mga kasamahan ng pulis na nakaantabay sa lugar at napatay ito.
Ayon sa Polomolok-PNP, isa sa mga drug surrenderee ang suspek at nakatapos sa community based rehabilitation program ngunit bumalik pa rin sa illegal na gawain.
Lumalabas din sa intel report ng PNP na miyembro ng Ansar Al Khilafa Philippines ang suspek na sangkot sa GenSan bombing.
- Latest