12 patay sa Cebu landslide
MANILA, Philippines — Labindalawang katao ang nasawi matapos gumuho ang isang bahagi ng bundok na tumabon at naglibing sa mahigit 30 kabahayan naganap kahapon ng umaga sa Sitio Sindulan sa pagitan ng Brgy. Tinaan at Brgy. Naalad, Naga City, Cebu.
Sa 12 namatay ay apat pa lang ang nakilala na sina Beatrice Hope Chavez, 4;Olivia Mora, 63; Abel Lobiano, 40; at Romeo Jabolinila, 40.
Sa ulat ni Chief Inspector Roderick Gonzales, acting Chief of Police ng Naga City Police dakong alas-6:00 ng umaga nang mangyari ang trahedya ng landslide sa mga kabahayan na malapit sa isang quarry site sa lugar.
Agad nagsagawa ng search and rescue operation ang mga otoridad sa mga miyembro ng pamilya na nasa loob ng kanilang bahay nang matabunan ng mga bato at lupa na nasa 100 katao.
Nabatid na bago ang insidente ay ilang araw nang nakakaranas ng malalakas na pag-ulan sa lugar kung saan ang bahagi ng bundok sa Sitio Sindulan, Brgy. Tina-an, Naga City ang tumabon sa nasabing mga kabahayan.
Sinabi ni Gonzales na hindi pa sila nawawalan ng pag-asa na may marerekober na buhay matapos na bandang alas-11:00 ng umaga kahapon ay makapag-text pa ang isang pamilya na may anim na miyembro na buhay pa sila.
Related video:
- Latest