Palparan, 2 pa kulong ng habambuhay
MANILA, Philippines — Pagkatapos ng 12 taon ay hinatulan ng habambuhay ng korte si retired General Jovito Palparan at dalawa pa kaugnay nang pagkawala ng dalawang UP students noong 2006.
Si Palparan kasama sina Lt. Col. Felipe Anotado at Staff Sgt. Edgardo Osorio ay hinatulan ng habambuhay na pagkabilanggo dahil sa kasong kidnapping at serious illegal detention sa pagkawala nina Karen Empeño at Sherlyn Cadapan na hanggang ngayon ay hindi pa natatagpuan.
Bukod dito ay inatasan ng korte ang tatlong akusado na magbayad ng tig-P100,000 civil indemnity at P200,000 para sa moral damages.
Sinimulang dinggin noong Hulyo 2011 ang kaso laban kay Palparan na noong panahong iyun ay nagtatago pa sa batas at nakulong lamang ito nang mahuli noong 2014 sa Sta. Mesa Maynila.
Napuno ng emosyon ang sala ni Judge Alexander Tamayo ng Malolos Regional Trial Court Branch 15 matapos niyang hatulan ng guilty sina Palparan, Anotado at Osorio na kung saan ay makikita sa mga kaanak at taga-suporta ng mga biktima sa nakamit nilang hustisya.
Habang binabasa ang sentensya ay sinigawan pa ni Palparan si Judge Tamayo ng “duwag” na binalaan ng huli na kakasuhan ng contempt na hindi pinansin ng una dahil makukulong naman siya sabay mura.
Agad na ipinag-utos ni Judge Tamayo na ilipat na sa New Bilibid Prison (NBP) sina Palparan mula sa kanilang Custodial Center sa Fort Bonifacio.
- Latest
