Pulis nahulihan ng isang sachet ng shabu
MANILA, Philippines — Isang aktibong pulis ang inaresto matapos na mahulihan ng isang sachet ng shabu nang sitahin habang ito naglalakad sa Tondo, Maynila, kamakalawa ng gabi.
Kinilala ang suspek na si PO1 Reygie Celso, 38, nakatalaga sa District Mobile Force Battalion (DMFB) ng Southern Police District (SPD) at residente ng Kapitbahayan Village, NBBS, Navotas City.
Batay sa ulat, alas-11:45 ng gabi ay nagsasagawa ng Anti-Criminality Campaign and Law Enforcement Operations (SACLEO) ang mga tauhan ng Station Drug Enforcement Team (SDET) sa Osorio St,, Tondo nang mamataan si Celso na pinagdudahan ang ikinikilos.
Sinita at kinapkapan si Celso at nakuha sa kaniyang katawan ang isang maliit na sachet ng shabu at ilang drug paraphernalia.
Nang dalhin sa presinto at imbestigahan ay natukoy na isang pulis ito na aktibo pa sa serbisyo.
Nakatakdang ipagharap ng reklamong paglabag sa section 11 ng Republic Act 9165 o Comprehensive Dangerous Drugs Act of 2002 si Celso na kinasuhan din ng administratibo.
- Latest
