Mag-utol natusta sa sunog
MANILA, Philippines — Kalunos-lunos ang sinapit na kamatayan ng batang magkapatid makaraang makulong ng apoy sa nasusunog nilang tahanan na nagresulta rin sa pagkatupok ng mahigit 300 kabahayan sa Brgy. Pajo, Lapu-Lapu City, Cebu nitong Biyernes.
Sa ulat ng Lapu-Lapu City Fire District Central ang sunog ay sumiklab pasado alas-5:10 ng hapon at idineklarang under control bandang alas-8:20 ng gabi kung saan unang napaulat na nawawala ang dalawang magkapatid na paslit na nagkakaedad 1 at 3 anyos.
Nitong Sabado, bandang alas-4 ng madaling araw ay buto na lamang nang matagpuan ng kanilang ina na si Jennifer Cañedo, 28 anyos ang kaniyang mga anak na nasawi sa sunog matapos na balikan ang puwestong kinatitirikan ng kanilang tahanan sa Sitio New Paradise, Brgy. Pajo, Lapu- Lapu City.
Sa imbestigasyon, nasa ground floor ang ginang nang biglang sumiklab ang apoy sa ikalawang palapag ng kanilang tahanan.
Lumilitaw na naglaro ng posporo ang dalawang paslit na tumupok sa kanilang bahay na siyang pinagmulan ng sunog.
- Latest