Lalaking matapang dedo sa parak
MANILA, Philippines - Hindi na umabot ng buhay sa ospital ang isang 32-anyos na lalaki na miyembro ng Sigue-sigue Sputnik gang matapos makipagbarilan sa mga rumespondeng pulis dahil sa pagwawala nito nang hindi makita ang dalawang kaaway na barangay tanod kamakalawa sa Tondo, Maynila.
Ang suspek na nasawi sa Gat Andres Bonifacio Memorial Medical Center (GABMMC) ay kinilalang si Wilfredo Modrigo ng Building 11, Unit 308, Vitas, Tondo.
Batay sa ulat, bago nangyari ang barilan dakong alas-3:45 ng hapon sa likuran ng Building, Katuparan Homes, Vitas, Tondo ay sumugod ang suspek sa barangay hall ng Barangay 101, Zone 8 na may bitbit na sumpak at malakas ang boses na hinahanap si Brgy. EX-O Jose Mondejor at isang hindi pinangalanang barangay tanod.
Nang hindi makita ang dalawang hinahanap ay lumabas ito ng barangay hall na nagwawala at sumisigaw kaya’t humingi ng police assistance sa Smokey Mountain PCP ang mga tao sa lugar.
Sa pagdating ng mga pulis ay agad sila umanong pinaputukan ni Modrigo na nauwi sa barilan na ikinasawi ng huli. - Ludy Bermudo-
- Latest
