Bomb factory ng BIFF, nakubkob
MANILA, Philippines – Nakubkob ng tropa ng pamahalaan ang bomb factory ng Bangsamoro Islamic Freedom Fighters (BIFF) sa pagpapatuloy ng all out offensive sa Mamasapano, Maguindanao kamakalawa.
Sa isinagawang assault operation ng militar ay nakubkob ng mga sundalo ang pinakamalaking kampo ng BIFF na pinamumunuan ni Mohammad Tambako sa Brgy.Dasikil, Mamasapano.
Kabilang sa mga narekober sa pagawaan ng bomba ng BIFF ay mga samutsaring mga kemikal na gamit sa paggawa ng bomba tulad ng mortar fuse, ammonium nitrate , blasting caps at tie wires.
Ang all out offensive ay inilunsad ng tropa ng militar sa kasagsagan na rin ng pagsigaw ng hustisya ng pamilya at mga kaibigan ng 44 Special Action Force (SAF ) commandos na minasaker matapos makorner sa bakbakan ng Moro Islamic Liberation Front (MILF) sa Oplan Exodus sa Mamasapano, Maguindanao noong Enero 25 ng taong ito.
Ang BIFF, ay ang breakaway group ng Moro Islamic Liberation Front (MILF) na sangkot sa pambobomba sa Central Mindanao.
Simula nang ilunsad ng AFP ang all out offensive noong nakalipas na linggo ay nasa 3 sundalo ang nasugatan habang nasa mahigit 20 ang nalagas sa BIFF.
- Latest