Guro tinodas ng 2 kasama

MANILA, Philippines - Isang pampublikong guro ang pinagbabaril ng dalawang hindi pa nakilalang  kalalakihan kamakalawa sa Purok Doña Iming, Barangay Sanito, Ipil, Zamboanga.

Ang  biktima na nasawi dahil sa apat na tama ng bala ay kinilalang si Roderic Ernie Menez, 34, guro sa Magdaup Elementary School at residente ng Purok Mirasol, Brgy. Poblacion ng lalawigan.

Sa ulat ng Police Regional Office (PRO)9, bago nangyari ang krimen dakong alas-12: 35 ng hapon ay sakay ang biktima ng isang tricycle kasama ang dalawang lalaki na hindi pa kilala na  sumundo sa kanya.

Pagdating sa Brgy Sanito ay bumaba na ang biktima kasama ang dalawang lalaki at naglakad na patungo sa isang fishpond sa lugar nang ito ay pagbabarilin ng kasama nitong dalawang lalaki.

 Isinasailalim pa sa masusing imbestigasyon ng mga otoridad ang  motibo ng krimen at pinaghahanap ang dalawang lalaking kasama nito.