2 lalaki sinalvage sa Antipolo

MANILA, Philippines – Dalawang bangkay ng lalaki na kapwa nakaposas na pinaniniwalaang biktima ng salvage ang natagpuan kahapon ng alas-4:00 ng madaling araw sa magkahiwalay na lugar sa Antipolo City.

Inilarawan ang unang biktima na tinatayang nasa edad na 27-30, may taas na 5’5”-5’6”, nakasuot ng puting t-shirt at blue na short pants na natagpuan sa gilid ng kalsada ng Barangay Sta. Lucia, Sumulong Highway.

Ang ikalawang biktima naman ay natagpuan, may 100 metro ang layo mula sa kinatagpuan ng unang biktima ay tinatayang nasa edad 32-34, may taas na 5’7”, nakasuot ng itim na t-shirt at maong na
short.

Ang dalawang biktima ay kapwa nagtamo ng tig-tatatlong tama ng bala at nakaposas na patalikod ang mga kamay.

Sa salaysay sa pulisya ng mga residente na sinasabing nakarinig sila ng pagmamakaawa at kasunod ay putok ng mga baril.

Narekober ng pulisya ang tig-tatlong basyo ng bala ng kalibre 45 baril malapit sa bangkay ng dalawang biktima.