Minimum fare sa jeep: P7.50 na lang! - LTFRB
MANILA, Philippines - Epektibong ipinatupad kahapon (Disyembre 11, 2014) ang bawas P1.00 pasahe sa pampasaherong jeep mula sa dating P8.50.
Kaya’t ang minimum fare ng jeep ngayon ay P7.50 na lang para sa unang apat na kilometro.
Ito ay makaraang aprubahan ng Land Transportation Franchising and Regulatory Board (LTFRB) ang hiling ng grupong National Council for Commuter Protection (NCCP) na maibaba ng ahensiya ang pasahe sa mga passenger jeepney dahil sa patuloy na pagbaba ng halaga ng krudo at gasolina sa merkado.
Sinabi ni LTFRB Chairman Winston Ginez na hindi na kailangan pa ang fare matrix para dito dahil ang bawat pasahe sa bawat destinasyon na ruta ng jeep ay babawasan na lamang ng halagang P1.00.
Binigyang diin ni Ginez na dapat agad sundin ng mga operator at driver ng jeep ang naturang direktiba dahil kung hindi ay maaari ang mga itong maparusahan o posibleng pagkansela sa kanilang prangkisa.
Wala pang desisyon ang LTFRB sa fare reduction sa mga passenger jeep sa ibang rehiyon at wala pa ring desisyon ang ahensiya kung may bawas pasahe din sa iba pang pampasaherong sasakyan tulad ng passenger buses, AUVs at taxi.
- Latest