Senglot naligo sa ilog, nalunod

MANILA, Philippines - Natagpuang patay ang isang 50-anyos na si Noli Dacallos na palutang-lutang sa ilog matapos itong maligo at malunod kahapon ng umaga sa Parola, Barangay Upper Kalaklan, Olongapo City.

Batay sa ulat, dakong alas-6:15 ng umaga nang matagpuang palutang-lutang sa pampang ng ilog katabi ng isang bangka ang biktima.

Sa pahayag ng isang William Ditona, exec-officer ng barangay, bago natagpuang patay ang biktima ay lumangoy ito  bandang alas-11:00 ng gabi pagkatapos uminom ng alak.

Dahil sa posibleng kalasingan ay hindi nito kinaya na lumangoy nang mapunta sa malalim na bahagi ng ilog kung kaya’t nalunod ito.