Magkapatid, mag-asawa natupok sa sunog

MANILA, Philippines - Isang magkapatid at isang mag-asawa ang nasawi sa magkahiwalay na insidente ng sunog sa lalawigan ng Zamboanga Sibugay kamakalawa ng gabi.

Sa ulat, dakong alas-7:00 ng gabi nang masunog ang isang bahay sa Purok Santan, Brgy. Poblacion, Ipil, Zamboanga Sibugay na ikinasawi ng magkapatid na kinila­lang sina Julito Tablate Jr., 13; at Julian, 7, na halos hindi na makilala nang marekober ang kanilang mga bangkay dahil sa gra­beng pagkasunog.

Kasalukuyan naman nilalapatan ng lunas ang kanilang inang si Imelda na na­sugatan sa balikat sa pag­ta­tangkang iligtas ang mga anak.

Lumilitaw sa imbestigasyon na ang nakasin­ding kandila na natumba ang sanhi ng sunog matapos namang maputulan ng kuryente ang pamilya.

Sa ikalawang sunog, namatay ang mag-asawang Marcelino Laing, 80 anyos at Domaya Laing, 75 matapos makulong din ng apoy sa loob ng na­su­sunog nilang bahay sa Brgy. Muyo, Buug, Zamboanga Sibugay pasado alas-9:00 ng gabi.

Bandang alas-8:00 ng umaga kinabukasan nang marekober ang mag-asawa na kapwa hindi na rin makilala.

Inaalam pa ang sanhi ng pagkasunog ng bahay ng mag-asawa.