Chery Tiggo nilasing ni DeBeer

MANILA, Philippines — Pinadapa ng ZUS Coffee ang Chery Tiggo, 25-15, 19-25, 25-20, 25-23, sa Pool B ng 2025 Premier Volleyball League (PVL) Reinforced Conference kahapon sa Dasmariñas Arena sa Cavite.

Nagpasabog si American import Anna DeBeer ng 37 points mula sa 34 attacks, isang service ace at isang block para sa 1-0 record ng Thunderbelles.

Nauna nang humataw si Farm Fresh import Helene Rousseaux ng conference-high 38 markers sa kanilang 22-25, 25-23, 25-19, 25-21 paggupo sa Nxled noong Huwebes.

“We see this in practice. So hindi naman masyadong surprise sa amin na ganyan iyong performance niya, talagang po­wer, tala­gang malakas siya,” wika ni coach Jerry Yee sa 24-anyos na si DeBeer.

Umiskor si rookie AC Miner ng 14 markers habang naglista si setter Cloanne Mondoñedo ng 22 excellent sets para sa tropa ni Yee.

Pinamunuan ni Cuban reinforcement Yunieska Batista ang Crossovers sa kanyang 22 points kasunod ang 15 markers ni Ara Galang at siyam na marka ni Cess Robles.

Matapos makatabla ang Chery Tiggo sa second set, 25-19, ay napasakamay ng ZUS Coffee ang 2-1 abante sa 25-20 panalo sa third frame.

Sa pamumuno ni DeBeer ay tuluyan nang tinapos ng Thunderbelles ang Crossovers sa fourth set, 25-23.

Pupuntiryahin ng ZUS Coffee ang kanilang back-to-back wins sa pagsagupa sa Galeries Tower sa Martes sa Smart Araneta Coliseum.