MANILA, Philippines — Naghayag ng paglahok ang matitikas na Bravo at Attractive Force sa magaganap na 4-Year-Old & Above Sptint Race na ilalarga sa Metro Turf, Malvar - Tanauan City, Batangas sa Agosto 20, (Linggo).
Inaasahang mapapahirapan ang Bravo at Attractive Force sa inaasam nilang titulo dahil pang stakes races din ang mga naghayag ng paglahok sa distansyang 1,000 meter race.
Sasakyan ni Jonathan Flores ang Bravo habang si former Philippine Sportswriters Association, (PSA) - Jockey of the Year awardee Patty Ramos Dilema ang gagabay sa Attractive Force sa karerang nakalaan ang P1.5M garantisadong premyo na ikakalat sa unang anim na kabayong tatawid sa meta.
Ang ibang makikipagtagisan ng bilis ay ang Agi Daw, Ambisioso, Gomezian, Gusto Mucho, Life Gets Better, Main Event, Palauig, Stardust at Weather Lang.
Susungkitin ng mananalong kabayo ang P900,000, mapupunta sa second placer ang P300,000, may P150,000 naman ang kukubrahin ng tersero habang tig-P75,000, P45,000 at P30,000 ang fourth, fifth at sixth ayon sa pagkakasunod.
Hahamigin naman ng breeder ng winning horse ang P75,000 habang tig- P45,000 at P30,000 ang second at third sa event na suportado ng (PHILRACOM).