Ajido, Bungubung bumandera sa Luzon qualifying
MANILA, Philippines — Binanderahan nina national junior record-holder Jamesray Michael Ajido at World Junior Championship campaigner Amina Bungubung ang 13 pang swimmers na nakakuha ng ‘provisionary status’ sa National Team na isasabak sa 35th Southeast Asia Age Group Championships.
Pasado ang dalawang miyembro ng Quezon City Buccaneers Swim Club sa qualifying time standard (QTS) ng kani-kanilang event sa pagtatapos ng national tryout Luzon qualifying na inorganisa ng World Aquatic-backed Philippine Swimming Inc (PSI) sa pamumuno nina president Miko Vargas at secretary general Batangas Rep. Eric Buhain.
“Mayroon na kaming 15 young swimmers na nalampasan ang QTS sa kani-kanilang event. We’re hoping, marami pa tayong mag-qualify sa tatlong natitirang tryouts,” ani Vargas.
Nagtala ang 14-anyos na si Ajido ng 2:14.33 sa boys’ 14-15 200m Individual Medley at 57.46 sa 100m butterfly para pumasa sa QTS na 2:14.83 at 58.43, ayon sa pagkakasunod.
Swak din ang 16-anyos na si Bungubung sa QTS 27.69 segundo sa girls’ 16-18 50m freestyle sa kanyang itinalang 27.58 segundo.
Sina Ajido at Bungubung ay nabigyan ng ‘provisionary status’ sa National Team na lalaban sa SEA Age Group Championships sa Agosto 24-26 sa Jakarta, Indonesia.
Nagningning din ang kanilang mga kasamahan sa QBSC na sina Mishka Sy at Jalil Taguinod sa event na suportado ng Philippine Sports Commission (PSC), Philippine Olympic Committee (POC) at Speedo.
- Latest
