Lady Bulldogs sinakmal ang Lady Warriors
MANILA, Philippines — Kinapitan ng National University Lady Bulldogs ang bangis ni Sheena Toring upang sakmalin ang University of the East Lady Warriors, 25-11, 25-20, 25-13, sa UAAP Season 84 women’s volleyball tournament kahapon sa SM Mall of Asia Arena sa Pasay City.
Humarabas si Toring ng kanyang 13 points, kasama ang walong kills, tatlong service aces at dalawang blocks upang tulungan ang Lady Bulldogs na ilista ang malinis na apat na panalo.
Bumakas din si Ivy Lacsina ng 13 markers habang kumana si Mhicaela Belen ng 11 points, 11 digs at walong puntos para sa NU na maagang uminit ang kanilang opensa matapos itarak ang 25-11 panalo sa first set.
Kumana si Janeca Lana ng siyam na puntos pero hindi sapat upang itaguyod ang lady Warriors sa panalo.
Nanatiling bokya sa panalo ang UE sa apat na laro.
Sa ikalawang laro, nakatikim na rin ng unang panalo ang nagdedepensang kampeon Ateneo Blue Eagles nang igupo ang Far Eastern University Lady tamaraws, 25-16, 25-14, 25-14.
Bida si Faith Nisperos na tumikada ng 14 puntos mula sa 11 spikes.
- Latest