Jerry Yee hahawakan uli ang PetroGazz Angels

MANILA, Philippines — Muling hahawakan ni veteran mentor Jerry Yee ang programa ng PetroGazz Angels na naghahanda para sa 2022 Premier Volleyball League (PVL) Open Conference na magsisimula sa Marso 16 sa isang bubble setup.

Matatandaang naging head coach na si Yee ng Gazz Angels noong 2018 at tumapos sa ikalimang puwesto ang kanilang tropa sa PVL Reinforced Conference at ikaapat naman sa Open Conference. Noong 2019, humalili sa kanyang puwesto si Arnold Laniog na siyang tumayong head coach ng Gazz Angels ngunit nanatili si Yee na consultant.

“Starting this year, he’s back to lead ng coaching staff and the team. He’s been part of the team since 2018. We want to tryout different approach this time with our new lineup,” ani Gazz Angels team manager Camille Cruz.

Babanderahan nina Myla Pablo at Grethcel Soltones ang Gazz Angels kasama ang mga bagong recruits na sina MJ Phillips, Aiza Maizo-Pontillas, Bang Pineda, Cienne Cruz, Djanel Cheng, Jonah Sabete, Nicole Tiamzon at Yeye Gabarda.

Galing ang Gazz Angels sa third-place finish sa Champions League noong Nobyembre.

Maganda rin ang rekord ng Gazz Angels sa PVL dahil nagkampeon na sila noong 2019 Reinforced Conference at runner-up sa 2019 Open Conference.