Harden humataw sa pang-6 sunod na panalo ng Brooklyn

LOS ANGELES — Naghulog si James Harden ng 37 points at nalampasan ng Brooklyn Nets ang fourth-quarter rally ng Clippers at angkinin ang 112-108 panalo para sa kanilang season-best na six-game winning streak.

Kumoleka rin si Harden ng 11 rebounds at 7 assists para sa Brooklyn (20-12) habang may 28 markers at 8 assists si Kyrie Irving.

Tinapos ng Nets ang kanilang road trip sa 5-0 mula sa mga panalo sa Golden State Warriors, Sacramento Kings, Phoenix Suns, nagdedepensang LA Lakers at Clippers.

Pinamunuan ni Paul George ang Clippers (22-10) sa kanyang 34 points at may 29 markers si Kawhi Leonard.

Sa Milwaukee,  kumolekta Giannis Antetokounmpo ng 38 points, 18 boards at 4 assists sa 128-115 pagdomina ng Bucks (18-13) sa Sacramento Kings (12-18).

Sa Tampa, Florida, umiskor sina Pascal Siakam at Fred VanVleet ng tig-23 points para akayin ang Toronto Raptors (16-15) sa 110-103 paggupo sa Philadelphia 76ers (20-11).

Humakot si Joel Embiid ng 25 points at 17 rebounds sa panig ng 76ers.

Sa Atlanta, tumipa si Trae Young ng 35 points at 15 assists habang nagtala si Clint Capela ng 22 points at 10 rebounds para sa 123-115 pagdagit ng Hawks (13-17) sa Denver Nuggets (16-14).

Sa New Orleans, kumamada si  Brandon Ingram ng 33 points at may 28 markers si Zion Williamson para banderahan ang 120-115 tagumpay ng Pelicans (13-17) sa Boston Celtics (15-15).

Sa Cleveland, naglista si Shai Gilgeous-Alexander ng 31 points at 9 assists para tulungan ang Oklahoma City Thunder (12-18) na kunin ang 117-101 panalo sa Cavaliers (10-21).

Sa Orlando, nagsumite si Nikola Vucevic ng 37 points at 11 rebounds at humataw si Evan Fournier ng season-high 29 points sa 105-96 pagdaig ng Magic (13-18) sa Detroit Pistons (8-22).