Durant, Irving humataw
NEW YORK — Humataw si Kevin Durant ng 31 points habang may 28 markers si Kyrie Irving para tulungan ang Brooklyn Nets na sapawan ang career-high 41 points ni center Bam Adebayo at talunin ang Miami Heat, 128-124.
Nagdagdag si James Harden ng 12 points, 11 assists at 7 rebounds para ibangon ang Nets (10-8) sa dalawang sunod na kabiguan sa Cleveland Cavaliers.
Kumamada si Irving ng 12 points sa huling 5:48 minuto ng fourth period para makalayo sa Heat (6-9) na nauna nang nakabangon mula sa 18-point deficit. Umiskor si Joe Harris ng 23 points kasama ang pitong three-pointers para sa Brooklyn.
Nagtala si Goran Dragic ng 19 points sa panig ng Miami at may tig-18 markers sina Kendrick Nunn at Duncan Robinson.
Sa Chicago, nagposte si Anthony Davis ng 38 points, 6 boards at 3 assists para igiya ang nagdedepensang Los Angeles Lakers (13-4) sa 101-90 tagumpay sa Bulls (7-9).
Sa Salt Lake City, kumolekta si Donovan Mitchell ng 23 points, 7 rebounds at 6 assists para sa 127-108 paglampaso ng Utah Jazz (12-4) sa Golden State Warriors (8-8).
Sa Detroit, humakot si center Joel Embiid ng 33 points tampok ang dalawang free throws sa huling 7.2 segundo para akayin ang Philadelphia 76ers (12-5) sa 114-110 paglusot sa Pistons (3-13).
Sa Dallas, pumukol si Eric Gordon ng season-high 33 points at nagsumite si DeMarcus Cousins ng 28 points at 17 rebounds sa 133-108 panalo ng Houston Rockets (6-9) kontra sa Mavericks (8-8).
Sa Minneapolis, nagtala si Naz Reid ng 20 points para tulungan ang Minnesota Timberwolves (4-11) sa 120-110 paggiba sa New Orleans Pelicans (5-10).
- Latest