Philippine karatekas may panahon pang maghanda

MANILA, Philippines — Sa kabila ng pagkakahinto ng ka-nilang ensayo dahil sa coronavirus disease (COVID-19) pandemic ay may sapat pang panahon ang mga national karatekas para paghandaan ang qualifying tournament ng 2021 Olympic Games.

Ayon kay 2019 Southeast Asian Games gold medalist Jamie Lim, ibubuhos ng national karatedo team ang kanilang panahon sa loob ng limang buwan, ang tatlong buwan dito ay sa loob ng ‘bubble’ training sa Inspire Sports Academy sa Calamba, Laguna.

“Five months is great enough,” sabi ng anak ni PBA legend Samboy Lim. “Since March naman na nag-lockdown we’ve been continuing our training. We have Zoom training and training on our own.”

Bukod kay Lim, papasok din sa ‘Calambubble’ sina 2019 SEA Games gold medal winner Junna Tsukii, Joan Orbon at lima pang national karatekas na naghahangad ng Olympic berth sa Tokyo, Japan.

Makakasama ng grupo sa ‘bubble’ training ang 27-member ng boxing team na pinamumunuan nina 2021 Tokyo Olympics-bound Irish Magno at 2019 Women’s World Championship gold medalist Nesthy Petecio at ang five-member taekwondo squad.

Pinaghahandaan ng national karatedo team ang Olympic qualifiers sa Hunyo sa Paris. Tatlong karatekas sa bawat weight division ang papasok sa main tournament ng 2021 Tokyo Olympics na nakatakda sa Hulyo 23 hanggang Agosto 8.

“Everyone wants to be part of the Olympics, and this is really the last shot,” wika ng 22-anyos na si Lim.