Manila vs Makati sa semis ng MPBL North division
Malolos City, Philippines — Nilusutan ng Manila Stars ang Pasig-Sta. Lucia Realtors, 82-80 at ginulpi ng Makati Super Crunch ang Bulacan Kuyas, 86-78 sa Game Two ng kani-kanilang quarterfinal series para itakda ang kanilang semifinal matches sa Chooks-to-Go MPBL Lakan Season North division na idinaos dito sa Malolos Sports & Convention Center kamakalawang gabi.
Kapwa na-sweep ng Manila at Makati ang kani-kanilang best-of-three quarterfinals showdown laban sa Pasig at Bulacan sa 2-0.
Matapos kunin ng Stars ang eight-point lead sa huling 1:31 minuto ng fourth quarter ay nagsalpak si Philip Manalang ng back-to-back triples para idikit ang Realtors sa 80-82.
Nabigo naman si Jeric Teng sa kanyang ibinatong game-tying floater sa nalalabing tatlong segundo sa huling posesyon ng Pasig kasunod ang mintis na tres ni Argel Mendoza na sumelyo sa panalo ng Manila.
Umiskor si Carlo Lastimosa ng 21 points para sa Stars habang nagtala si Chris Bitoon ng 19 points at 7 rebounds at nagdagdag si Aris Dionisio ng 14 points at 8 rebounds.
Nauna nang tinalo ng Manila ang Pasig sa Game One, 91-88 noong Pebrero 18.
Nakahugot naman ang Realtors ng 25 points at 10 rebounds mula kay Teng at may 21 points at 10 rebounds si Josan Nimes,
Nagdagdag ng 14 points si Leo Najorda kasunod ang 12 markers ni Manalang.
Matapos mawala ang kanilang homecourt edge dahil sa kabiguan ng Guadalupe Viejo Gym na makuha ang league standards ay naging determinado ang Super Crunch na sibakin ang Kuyas sa kanilang tahanan.
“Losing the homecourt, I told the players we just have to stay together,” sabi ni Makati coach Beaujing Acot na tinalo ang Bulacan sa Game One, 94-88, noong Pebrero 18.
Tumipa sina Cedric Ablaza at Joshua Torralba ng tig-22 points para sa Makati, nakakuha ng 16 points, 9 boards at 7 assists kay Jeckster Apinan.
Nagtala naman ng 16 points si Stephen Siruma sa panig ng Bulacan habang may 12 at 11 markers sina Jovit Dela Cruz at JR Alabanza, ayon sa pagkakasunod.
- Latest
