Ayaw nang patagalin ng Ginebra

MANILA, Philippines — Nakatutok ang Barangay Ginebra sa pagkopo sa kanilang ikatlong PBA Governor’s Cup crown sa hu-ling apat na taon at pang-12 kampeonato sa kabuuan.

Subalit bago mangyari ito ay kailangan muna nilang iligpit ang karibal na Meralco ngayong alas-7 ng gabi sa Game Five ng kanilang best-of-seven championship series sa MOA Arena sa Pasay City.

Mas mahirap isara ang isang serye, ayon kay two-time PBA Grand Slam champion coach Tim Cone ng Gin Kings.

“This team has shown a lot of character in the past when we played them,” wika ng 62-anyos na si Cone sa Bolts. “We got 2-0 on them and they came back and beat us two straight in one series. So we know they’re capable of coming back.”

Kinuha ng Ginebra ang Game One, 91-87 bago nakatabla ang Meralco sa Game Two, 104-102.

Inangkin naman ng Gin Kings ang Game Three, 92-84 at ang Game Four, 94-72 para itala ang 3-1 bentahe sa kanilang titular showdown ng Bolts at makalapit sa pagsikwat sa ika-12 korona.

“I would love it if it did, but no I don’t think so. We will try our best obviously,” wika ni Cone, muling sasandal kina import Justin Brownlee, Stanley Pringle, LA Tenorio, Japeth Aguilar at Scottie Thompson ka-tapat sina three-time PBA Best Import Allen Durham, Chris Newsome, Baser Amer, Raymond Almazan, Allein Maliksi at rookie Bong Quinto.

Noong 2016 ay isinara ng Ginebra ang kanilang title duel ng Meralco sa Game Six tampok ang dramatikong three-point shot ni Brownlee laban kay Durham bago nakatakas sa Game Seven noong 2017.

“So we just have to figure out a way to bounce back from this and play better basketball,” sabi ni one-time PBA Grand Slam titlist Norman Black sa kanyang mga Bolts.

Kung mananalo ang Meralco sa Ginebra ay ilalaro ang Game Six sa Linggo sa Philippine Arena sa Bocaue, Bulacan.

“We just have to be aware na ang Meralco will really come out strong on Friday,” ani Tenorio.