Standhardinger tinanghal na BPC

MANILA, Philippines — Nang ibigay siya ng San Miguel sa NorthPort kapalit ni Fil-Tongan big man Moala Tautuaa ay nangako si Christian Standhardinger na ibibigay niya ang lahat ng kanyang makakaya para maipanalo ang bagong tropa.

Iginiya ng 6-foot-8 Fil-German power forward ang No. 8 Batang Pier sa pagsibak sa No. 1 NLEX Road Warriors papasok sa semifinals series ng 2019 PBA Governor’s Cup ngunit pinatalsik sila ng Ginebra Gin Kings sa kanilang best-of-five semifinals showdown, 3-1.

Hindi nasayang ang impresibong inilaro ng Gilas Pilipinas standout.

Bago ang Game Four ng PBA Finals ay iginawad kay Standhardinger ang Best Player of the Conference award kahapon sa Smart Araneta Coliseum.

Umupo si Standhardinger sa No. 3 sa labanan para sa BPC award sa kanyang 35.1 statistical points sa ilalim nina five-time PBA MVP June Mar Fajar-do (38.8) ng San Miguel at Columbian Dyip star guard CJ Perez (37. 2).

Inungusan din ni Standhardinger sina TNT Katropa point guard Jayson Castro (31.6 SPs) at NLEX playmaker Kiefer Ravena (34.5 SPs).

Nakakolekta si Standhardinger ng kabuuang 1,011 votes para angkinin ang BPC award kumpara kina Fajardo (657), Castro (615), Perez (506) at Ravena (481).

Samantala, tinalo naman ni Allen Durham (1,170 votes) ng Meralco si Justin Brownlee (937) ng Ginebra para sa PBA Best Import award sa ikatlong pagkakataon.

Nauna nang inangkin ni Durham ang nasabing tropeo nang igiya ang Bolts sa runner-up finish noong 2016 at 2017 PBA Governor’s Cup.

Kung mananalo ang Ginebra kagabi ay isang panalo na lamang ang kanilang kailangan para sa kanilang pang-12 titulo sa PBA sa kanilang pang-26 finals appearances. Lumalaban naman ang Meralco na asam ang kanilang kauna-unahang titulo sa liga sa kanilang ikatlong finals appearance pa lamang.