Phl Esports team sasabak na
MANILA, Philippines — Anim na gintong medalya ang tatargetin na maibulsa ng Sibol Philippine Esports team sa pagsisimula ng kanilang laban sa inaugural staging ng Esports tournament sa 30th Southeast Asian (SEA) Games ngayong araw sa The Arena sa San Juan City.
Matapos maging isang demonstration sport noong 2018 Jakarta-Palembang Asian Games sa Indonesia, ngayon ay isang medal-contested event na ang esports nang I-sanction ito ng International Olympic Committee (IOC).
Bubuksan ang unang araw ng kumpetisyon sa group stage qualifying rounds ng tatlong laro na Hearthstone, Starcraft II at Mobile Legends: Bang Bang bandang alas-10:30 ng umaga.
Unang sasalang ang pambato ng bansa sa Hearthstone na sina Jacinta Dee, na nasa Group A, at Dustin Mangulabnan, sa Group B at makakabangga nila ang manlalaro mula sa mga bansang Vietnam, Thailand, Malaysia, Indonesia at Singapore.
Matapos nito ay magpapakitang-gilas naman ang Starcraft II team na pangungunahan nina Justin Santos (Group A) at Caviar Amcapado (Group B) habang susundan naman nito ng makikipagtunggali nito sa Mobile Legends: Bang Bang team.
Nasa Group B ng MoBa event ang Pilipinas, ibabandera sina Kenneth Villa, Karl Nepomuceno, Carlito Ribo, Jeniel Bata-anon, Kyle Arcangel, Allan Castromayor at Rafael Torculas; at makakaharap nito ang mga manlalaro mula sa Indonesia, Laos at Thailand.
Umaasa ang Nationals na maduduplika nila ang dominasyon na kanilang ginawa sa esports test event noong Nobyembre kung saan tatlong gintong medalya mula sa Tekken 7, Mobile Legends at Dota 2 ang ninakaw ng mga ito.
Kinabukasan naman ang semifinals at finals ng tatlong nasabing laro bago ang pagsalang ng natitirang events na Tekken 7, Dota 2 at Arena of Valor.
- Latest