Philippine 3x3 teams nagpasiklab

MANILA, Philippines — Magarbong sinimulan ng Gilas Pilipinas 3x3 men’s at women’s team ang unang pagdribol ng 3x3 basketball competition sa 30th Southeast Asian (SEA) Games kahapon sa The Arena sa San Juan City nang dominahin ng women’s team ang unang araw ng torneo matapos walisin ang tatlong bansang katunggali para agarang makalusot sa semi-finals na lalaruin ngayong araw.

Unang pinadapa ng quartet nila Jack Animam, Afril Bernardino, Claire Castro at Janine Pontejos ang bansang Myanmar bitbit ang 21-4 na dominasyon at sinundan nito ng pahirapang pagtakas sa Malaysia 15-13 at Indonesia 16-13.

Umariba si Pontejos na nagtala ng 20 puntos sa tatlong laro habang may 14 markers si Bernardino at may 11 at 9 points sina Castro at Animam.

“Panibagong araw na naman bukas so kailangan tuluy-tuloy pa rin yung momentum namin na kailangan manalo kami hanggang matapos ang 3x3 at makuha yung gold,” ani Pontejos.

Samantala, winalis din ng 3x3 men’s ang unang araw ng torneo nang pataubin ang Indonesia, 21-17; Myanmar, 21-10; Vietnam 21-15; at Thailand 21-10.

Kumubra ng 34 points sa apat na laro si Jason Perkins habang may 28 markang ambag si CJ Perez at naramdaman din sina Mo Tautuaa at Chris Newsome na may 14 at 8 points.

Sasabak ang 5x5 men’s at women’s basketball team sa Dec. 4 at 5 sa MOA sa Pasay City.