Alyssa, myla magkakasubukan sa kanilang semifinals series
MANILA, Philippines — Simula na ng giyera ng apat na koponan para sa kanilang inaasam na korona sa Premier Volleyball League (PVL) Season 3 Open Conference sa Game One ng best-of-three semifinal series sa The Arena sa San Juan City.
Haharapin ng nagdedepensang Creamline Cool Smashers ang karibal na Motolite ngayong alas-2 ng hapon kasunod ang tapatan ng PetroGazz Angels at BanKo Perlas Spikers sa alas-4.
Sasabak sa semifinals ang Cool Smashers bitbit ang mataas na kumpiyansa matapos walisin ang double-round eliminations tampok ang 25-19, 25-22, 24-26, 25-16 pagpapadapa sa Motolite.
Ipaparada ng Creamline ang nagbabalik-tropa na sina Alyssa Valdez at Jia Morado, nagmula sa Japan kasama ang Nationals para sa kanilang training camp bilang paghahanda sa 30th Southeast Asian Games, katuwang sina Jema Galanza, Michele Gumabao, Pau Soriano at Risa Sato.
Susubukan naman ng Motolite na makabawi makaraang mawalis ng kanilang karibal sa preliminaries.
Sasandalan ng Motolite sina Myla Pablo, Tots Carlos, Isa Molde, Iris Tolenada, Bern Flora, Marist Layug, Jessma Ramos at Thang Ponce.
Samantala, pipilitin naman ng Gazz Angels na muling makatuntong sa Finals para patunayan sa lahat na kaya nilang manalo kahit walang imports.
Napatatag ng PetroGazz ang kapit sa No. 2 spot nang igupo ang Choco Mucho, 25-18, 25-21, 25-18, noong Miyerkules.
Muli nilang aasahan sina Jonah Sabete, Chie Saet, Paneng Mercado, Jovielyn Prado, Cherry Nunag, Jeanette Panaga at Cienne Cruz.
Sa panig naman ng Perlas Spikers ay susubukan nilang makapasok sa Finals at muling kakapit kina Dzi Gervacio, Sue Roces, Nicole Tiamzon, Kathy Bersola, Roma Doromal, Jem Ferrer at Princess Balang.
- Latest