Finals ticket hangad ng apat na tropa
MANILA, Philippines — Simula na ng tunay na bakbakan ng apat na natitirang college-based squads para umabante sa Finals ng Premier Volleyball League Season 3 Collegiate Conference.
Maghaharap sa ‘do-or-die’ Game Three sa semifinals ang Adamson Lady Falcons at College of Saint Benilde Lady Blazers ngayong alas-9 ng umaga at magtutuos naman sa alas-11 ang UST Golden Tigresses at Ateneo Lady Eagles sa The Arena sa San Juan City.
Unang nakanakaw ng panalo ang Lady Blazers sa Game One ng kanilang semis series ng Lady Falcons sa bisa ng 26-24, 28-26, 17-25, 21-25, 15-13 panalo sa pamumuno ni senior spiker Klarisa Abriam na nagrehistro ng 27 points.
Pero hindi pumayag ang Adamson na umuwi sila ng luhaan kaya’t umariba nang husto ang tropa sa Game Two, 25-12, 21-25, 25-22, 19-25, 15-11, matapos sumandal sa mainit na laro ni Trisha Genesis na may 24 markers at itulak ang Game Three.
Parehong kuwento rin ang nangyari sa serye sa pagitan ng Golden Tigresses at Lady Eagles.
Nadagit ng mga taga-Katipunan ang Game One nang padapain nila at burahin ang winning-streak ng UST sa loob ng apat na sets, 25-15, 24-26, 25-16, 25-18, tampok ang pagbandera kay super rookie Faith Nisperos na nagtala ng 19 points at 14 digs.
May tsansa na sana ang Ateneo na tapusin ang serye pero hindi nagpadaig ang UST at balanseng opensa ang ginamit na sandata para mapadapa ang UAAP Season 81 champions sa Game Two, 24-26, 25-18, 25-17, 25-17, sa pangunguna nina Eya Laure, Janna Torres at Imee Hernandez.
Ang dalawang koponan na makakalusot ay maghaharap sa best-of-three title series na sisimulan sa Miyerkules sa The Arena.
- Latest