Blaze Spikers inagaw ang solong liderato
Tinapos ang ratsada ng Movers
MANILA, Philippines — Tinuldukan ng Petron Blaze Spikers ang ipinosteng 11-game winning streak ng F2 Logistics Cargo Movers matapos angkinin ang five-set victory, 26-28, 27-29, 25-19, 25-20, 15-6, sa 2019 Philippine Superliga (PSL) All-Filipino Conference kahapon sa The Arena sa San Juan City.
Ipinagpag ng Blaze Spikers ang kanilang two-set deficit at umalagwa na parang diesel sa sumunod na tatlong sets para irehistro ang ika-10 sunod na arangkada at nakawin ang top spot tangan ang 12-1 kartada sa nasabing torneo.
Umariba nang husto para sa Petron ang bulinggit na si Sisi Rondina na pumalo ng 22 points sa likod ng 21 attacks at 1 block.
Nagdagdag naman si veteran Ces Molina ng 20 markers para sa panalo ng Blaze Spikers.
Nagparamdam din para sa tagumpay ng koponan sina Bernadeth Pons at Mika Reyes na may 16 at 10 points, ayon sa pagkakasunod.
Ang third set ang naging mitsa ng nagdedepensa sa korona para bumangon, gumising at dominahin ang fourth set sa tulong ng kanilang mga bench players para maipuwersa ang deciding set.
Binugbog nang husto ng Petron ang F2 Logistics pagpasok ng fifth set sa pagposte ng 10-0 bentahe hanggang lampasuhin na nito ang kanilang first-round tormento.
“Siyempre, sobrang thank you kay Lord. Unang-una thank you Lord kasi siyempre, kasi kanina medyo down kami. Nalulungkot lang kasi ‘yung galaw namin hindi pa mailabas lahat. Pero ‘yung first two sets namin hindi naman kami nagpapabaya,” sabi ni head coach Shaq delos Santos matapos ang laro.
Ito ang unang kabiguan ng Cargo Movers sa komperensya at nahulog sa ikalawang puwesto bitbit ang 11-1 marka.
Nanguna para sa F2 Logistics si Fil-American spiker Kalei Mau na may 25 points kasama ang 22 digs at 10 excellent receptions.
Nag-ambag naman ng 15 markers si Majoy Baron kasunod ang 14 points ni Ara Galang para sa unang pagkatalo ng tropa ni mentor Ramil de Jesus sa torneo.
- Latest