Ancajas may balak lumaban sa Oktubre

MANILA, Philippines — Sa Oktubre posibleng muling umakyat sa boxing ring si Filipino world super flyweight champion Jerwin Ancajas matapos ang matagumpay na pagdedepensa sa kanyang suot na International Boxing Fede-ration crown noong Mayo.

Sinabi ni trainer/manager Joven Jimenez kahapon na inaasahang malalaman sa susunod na linggo kung sino ang susunod na makakatapat ni Ancajas.

Nanggaling ang 27-anyos na tubong Panabo City, sa seventh-round TKO victory laban kay Japanese challenger Ryuichi Funai para mapanatiling suot ang kanyang IBF super flyweight title noong Mayo 5 sa Stockton, California.

Kasalukuyan nang nag-eensayo si Ancajas para sa pangwalong sunod na pagtatanggol sa kanyang titulo.

“Nakaka-four rounds of sparring pa si Jerwin ngayon,” wika ni Jimenez sa kanilang training camp sa Survival Camp sa Magallanes, Cavite City. “Pinaplano pa lang namin ang gagawin naming training.”

Ibinabandera ni Ancajas ang kanyang 31-1-2 win-loss-draw ring record kasama ang 21 knockouts.

Ilan sa mga tinitingnan na laban ng kampo ni Ancajas ay sina World Boxing Council champion Juan Francisco Estrada ng Mexico, Andrew Maloney ng Australia at Alexandru Marin ng Romania.

Sa tatlo ay mas gustong labanan ni Ancajas si Estrada (39-3-0, 26 KOs) na tumalo kay Thai pound-for-pound champion Srisaket Sor Rungvisai para sa WBC crown noong Abril.