Go For Gold tangka ang Guinness World Record sa pagdi-dribble

MANILA, Philippines — Kilala ang mga Pinoy sa pagbasag ng mga Guinness World Records.

At sa Hulyo 21 ay umaasa ang Go For Gold Philippines na makikiisa ang Filipino basketball community sa pagsira sa ‘Guinness World Record for The Most Number of People Dribbling Simultaneously’.

Kumpiyansa si Go For Gold godfather Jeremy Go na halos 10,000 dribblers ang lalahok sa nasabing event sa Mall of Asia Concert Grounds sa Pasay City.

“Being a SEA Games year, we want to be able to encourage a lot of Filipinos to be active in supporting sports and our national athletes,’’ wika ni Go.

“We believe that this will be a good way to bring buzz and excitement to kick start our country’s program,’’ dagdag pa ng vice president for marketing ng Powerball Marketing & Logistics Corporation, ang prime mover sa likod ng Go For Gold project.

Ang mga dribblers na may edad 16-anyos pataas ay dapat patalbugin ang bola sa loob ng limang minuto nang sabay-sabay.

Nagtipon ang United Nations Relief and Work Agency (UNRWA) ng 7,556 dribblers para ilista ang nasabing record noong Hulyo 22, 2010 sa Rafah, Gaza Strip sa Paletine bilang bahagi ng kanilang summer program.

Ito ang inaasahan ng Go for Gold Philippines na mabasag ng mga Pinoy.

Suportado ito ng International Basketball Federation (FIBA) na nakipagtambal sa Go For Gold para hikayatin ang mga Pinoy na itaguyod ang Gilas Pilipinas men’s basketball team ng Samahang Basketbol ng Pilipinas sa darating na FIBA World Cup sa China sa Agosto 31 hanggang Setyembre 15.

Inimbitahan ding makiisa sa world-breaking event ang mga national athletes mula sa iba’t ibang national sports association sa ilalim ng Philippine Olympic Committee at Philippine Sports Commission.

Ang mga interesado ay maaaring magpatala sa www.goforgoldworldrecordattempt.com.

“Also in line with our motto ‘Basta Pilipino Ginto,’ where we believe that the Filipino deserve the best, whether it is in training, sports, events, even scratch tickets, we want to have an international record that we can be proud of,’’ dagdag ni Go.