Warriors inunahan ng Raptors

TORONTO -- Dumiretso ang Raptors sa kanilang pang-limang sunod na arangkada matapos pabagsakin ang nagdedepensang Golden State Warriors, 118-109 sa Game One ng NBA Finals.

Nauna nang nagposte ng apat na dikit na panalo ang Toronto mula sa 0-2 pagkakahulog sa kanilang Eastern Conference Finals ng Milwaukee Bucks.

Nagpasabog si forward Pascal Siakam ng team-high na 32 points tampok ang 14-of-17 fieldgoal shooting para pagbidahan ang Raptors sa series opener ng kanilang best-of-seven championship series ng Warriors.

Nagdagdag naman si Kawhi Leonard ng 23 markers para sa Toronto, nakamit ang unang panalo sa championship round ng NBA.

“We’ve got a lot of bodies,” sabi ni Siakam. “We’ve got guys just willing to move and play defense. We use it to our advantage. I think we’re doing a pretty decent job. We made some mistakes but for the most part we played solid.”

Muling pamamahalaan ng Raptors ang Game Two sa Lunes (Manila time) sa Scotiabank Arena.

Nagtala si center Marc Gasol ng 20 points at 7 rebounds para sa Toronto bago na-foul out sa huling 1:14 minuto ng fourth quarter.

Umiskor naman sina guards Fred VanVleet at Danny Green ng 15 at 11 points, ayon sa pagkakasunod.

Binanderahan ni star guard Stephen Curry ang Golden State, hindi pinaglaro si top scorer Kevin Durant (sprained ankle), sa kanyang 34 points, samantalang may 21 markers si Klay Thompson.

Tumipa si Draymond Green ng triple-double sa kanyang tinapos na 10 points, 10 rebounds at 10 assists para sa Warriors.