SEA Games budget malaki ang tinapyas

MANILA, Philippines — Hindi nagustuhan ni Philippine South East Asian Games Organizing Committee (PHISGOC) chairman Alan Peter Cayetano ang ginawang pagtapyas ng Senado sa pondong gagamitin para sa pangangasiwa sa 30th Southeast Asian Games.

Mula sa inisyal na P7.5 bilyon ay binawasan ito ng Senado sa P5 bil-yon o 33 porsiyento.

“Kung napunta sana iyang pera (P2.5 bilyon) na ‘yan sa free education or may hospital na kailangang gawin, it will be more than a privilege for us na suportahan ‘yon kahit na mabigat sa organi-zers na biglang mag-recalibrate losing 33 percent,” ani Cayetano kahapon.

“Ang problema ay napunta ito sa projects ng mga Senador, unspecified projects ng mga Senador,” dagdag pa ng dating Secretary ng Department of Foreign Affairs sa kanyang mga dating kasamahan.

Dahil dito ay naki-pagpulong kahapon ang PHISGOC kasama ang Philippine Sports Commission sa iba pang ahensya ng pamahalaan.

“Madalas tayong magsalita na sports, sports, sports. Kapag may hearing ipinapatawag ang PSC, POC at mga NSAs kung bakit hindi nanalo ng medalya. But then pagda-ting sa putting your money where your mouth is, eh baligtad, na-divert ‘yung pera,” wika ni Cayetano.

Nakatakda ang 2019 SEA Games, maglalatag ng kabuuang 56 sports na may 523 events, sa Nobyembre 30 hanggang Disyembre 11.

Tatayong main hub ng biennial meet ang New Clark City Sports Complex sa Capas, Tarlac, habang ang Clark cluster ang mangangasiwa sa 21 sports at ang Metro Manila cluster, tatayong secondary hub, ang pagdarausan ng 19 sports.

Ang Subic at BLT (Batangas, La Union at Tagaytay) clusters ang mamamahala sa 14 at 4 sports, ayon sa pagkakasunod.

“Of course, we would like to be the champions, but unity is the heart and soul of the hosting,” wika ni PSC chairman William ‘Butch’ Ramirez.

Samantala, pumirma ng partnership agreement sa PHISGOC ang Atos (official games management system provider) ng Spain, Philippine Airlines (official airline carrier), GL Events (integrated solutions at services provider) ng France, ang Thailand-based na Grand Sport (sports apparel company), Sonak Corporation (Official game ball at sporting equipments), Asics (official kits) ng Japan at ang Spain-based na MediaPro Asia (official media rights at sponsorships partner).

“More than just investing in this year’s SEA Games, you are investing in our country, our people, and the development of our athletes. Not only Filipino athletes but athletes of the Southeast Asian region,” wika ni Ramirez.