May pambawi si Curry

PHOENIX — Masama man ang shooting ni Stephen Curry ay hindi ito nakaapekto sa pagbibida niya para sa Golden State.

Humugot si Curry ng 10 sa kanyang 20 points sa fourth period para banderahan ang 117-107 pagpapayukod ng Warriors sa Suns.

Matapos kunin ng Phoenix ang 94-88 abante ay naghulog ang Golden State ng 13-0 bomba, tampok ang three-point shot ni Curry para iwanan ang Phoenix sa 101-94 sa huling 5:46 minuto ng fourth period.

Tumipa si Klay Thompson ng 25 points para sa nagdedepensang kampeon na tinalo ang Phoenix sa pang-18 sunod nilang pagtutuos.

Nagdagdag si Kevin Durant ng 21 points kasunod ang 18 markers ni DeMarcus Cousins para sa Warriors.

Pinamunuan naman ni Kelly Oubre Jr. ang Suns sa kanyang 25 points habang may 23 markers si Deandre Ayton.

Hindi naglaro si Phoenix leading scorer Devin Booker dahil sa right hamstring injury.

Nasibak si Golden State forward Draymond Green sa fourth quarter matapos matawagan ng kanyang ikalawang technical foul.

Sa Dallas, humakot si Giannis Antetokounmpo ng 29 points at 17 rebounds para sa 122-107 pananaig ng Milwaukee Bucks kontra sa Mavericks.

Ito ang ikaanim na dikit na panalo ng Bucks.

Nagdagdag si big man Brook Lopez ng 20 points para sa Bucks, binitbit ang NBA best record na 41-13.