Meggie Ochoa unang Asyanong naka-gold sa Jiu-jitsu World Championships

MANILA, Philippines — Gumawa ng kasaysayan si jiu-jitsu fighter Meggie Ochoa bilang kauna-unahang Asyanong nakasungkit ng gintong medalya sa prestihiyosong Jiu-jitsu World Championships na ginanap sa Baltiska Hallen sa Malmö, Sweden.

Nasungkit ni Ochoa ang gintong medalya sa -49kg women’s senior division matapos pataubin si Nini Hoang ng Canada sa championship round sapamamagitan ng 2-0 desisyon.

Nakapasok si Ochoa sa finals matapos igupo sina Morgane Houx ng France (4-0) sa first round, Anna Augustyn ng Poland (2-0) sa quarterfinals at Laetitia Boes ng France (2-0) sa semifinals.

“History is made. Meggie Ochoa becomes the Philippines’ first Jiu-Jitsu World Champion. Meggie is also the first Asian to win gold in the worlds. We are extremely proud of you,” ayon sa post ng Jiu-Jitsu Fe-deration of the Philippines.

Si Ochoa lamang ang bukod-tanging miyembro ng pambansang koponan na nakasungkit ng medalya sa torneo matapos bigong umabot sa medal round ang iba pang Pinoy fighters.

Parehong pumang-anim sina Kaila Napolis (women’s -55kg) at Apryl Eggenger (women’s -62kg) sa kani-kaniyang dibisyon habang ikawalo naman si Mariella Rafael sa women’s -55kg.

Nagtapos din sa ikawalo sina Jan Cortez (men’s -56kg) at Marc Lim (men’s -69kg).

Ang iba pang miyembro ng koponan ay sina Adrian Guggenheim (men’s -77kg), Marvin Mariano (men’s -77kg), Gian Dee (men’s -62kg), Carlo Pena (men’s -62kg) at Dean Roxas (men’s -85kg).