CDO swimmer lumangoy ng 4-golds

Cagayan De Oro City, Philippines — Lumangoy ng apat na gintong medalya si  Jake Cabilao ng CDO National High School upang dominahin ang swimming competition kahapon sa huling araw ng 2018 Philippine Sports Commission - Differently-Abled Sports 4 LIFE Paragames sa Xavier University–Ateneo de Cagayan Sports Complex dito.

Taglay ang matinding  determinasyon, nagwagi ang 17-anyos na si Cabilao sa boys 50-m freestyle, 50-m backstroke, 50-m breastroke at 50-m butterfly para maging most bemedalled athlete sa dalawang araw na kumpetisyon na inoorganisa ng PSC at sinusuportahan ng Cagayan de Oro City government.

Bukod kay Cabilao, nakakuha rin ng dalawang gold ang 8-gulang na si Gabriel Lumani ng Indahan Elementary School mula sa athletics event matapos manalo sa boys 100-m dash at long jump sa Partial Visual Impairment-Elementary category.

“I’m very proud of my son. He really pushed himself up para mananalo ng gintong medalya sa athletics. He deserved it,” sabi ni Catherine Lumani, ina ni Gabriel.

Ito na ang ikalawang kumpetisyon na sinalihan ng Grade 2 estudyante na si Lumani matapos ang kanyang silver medal finish sa Northern Mindanao Regional kumpetisyon noong Hulyo.

“He (Gabriel) is very inspired. He really wanted to learn and excel in sports. Gusto talaga niyang mayroon siyang maiuwi na medalya at pagkatapos very proud siya sa sarili,” ayon naman kay coach Shalom Joy Magno.

Sa ibang events ng swimming, nakakuha rin ng dalawang ginto si Jamie Dapat ng West City Central School mula sa girls 50-m freestyle at 50-m breastroke habang si Mariell Ann Olivina ng Bulua National High ay nanalo sa girls 50-m backstroke at 50-m butterfly.