2018 PNG bubuksan ni Pres. Duterte

MANILA, Philippines – Uumpisahan na ng mahigit 5,000 atleta kabilang na ang mga miyembro ng national team ang tagisan para sa gold medal sa pagbubukas ngayon sa 2018 Philippine National Games na dadaluhan ni Pangulong Rodrigo R. Duterte bilang panauhing pandangal sa Cebu City Sports Center.

Bukod kay Pres. Duterte, inaasahan din ang pagdalo nina Executive Secretary Salvador Medialdea, Cabinet Secretary Leoncio Evasco Jr. at Presidential Management Staff  head Sec. Christopher “Bong” Go.

Inimbitahan din sa opening rites sina  2019 Southeast Asian Games Organizing Committee chairman at DFA Secretary Alan Peter Cayetano, Philippine Olympic Committee (POC) president Ricky Vargas, POC chairman at Tagaytay City Rep. Abraham “Bambol” Tolentino at iba’t ibang presidente ng mga National Sports Association (NSAs).

 Ang PNG na inoorganisa ng Philippine Sports Commission  ay ang national open championships ng  iba’t-ibang sports disciplines kaya obligadong sumali ang mga miyembro ng Philippine national team na kumakatawan sa kanilang probinsya o siyudad.

Sinabi ni Ricky Ballesteros ng Cebu City Sports Commission, mahigit 700 estudyante performers mula sa iba’t ibang colleges at universities ang mape-perform sa opening ceremonies.

 “We have prepared the best opening presentation yet in any PNG with hundreds of performers from all over the region,” sabi ni Ballesteros.

Ito na ang ikalawang hosting ng Cebu sa PNG, ang una ay noong 1997 sa panahon pa ni dating PSC chairman Philip Ella Juico.

Ang mananalo na LGUs ay makakatanggap ng Php 5 million mula sa PSC habang Php 4 million naman sa first runner-up, Php 3 million sa second runner-up, Php 2 million sa fourth placer at ang fifth placer ay mag-uuwi ng Php 1 million.

Mahigit 22 sports disciplines ang paglalabanan kabilang na ang archery, arnis, athletics, badminton, boxing, chess, cycling, danceports, judo, karatedo, sepak-takraw, softball, swimming, table tennis, taekwondo, lawn tennis, triathlon, beach volleyball, indoor volleyball at weightlifting.

Ayon kay Annie Ruiz, ang PNG project director, ang gymnastics at rugby football ay gaganapin sa Rizal Memorial Sports Complex at International School of Manila kasabay sa pagdaraos sa Cebu Games.