Tacloban at BanKo-Perlas pakay ang win No. 2
MANILA, Philippines – Hangad ng Tacloban at Banko-Perlas na makisosyo sa liderato sa kanilang pagtatagpo sa 2018 Premier Volleyball League Reinforced Conference Season 2 sa FliOil Flying V Center sa San Juan City.
Tangan ang parehong 1-1 kartada, maghaharap ang Fighting Warays at Perlas Spikers ngayong alas-6:30 ng gabi.
Kapwa asam din ng BaliPure Water Defenders at Petro Gazz Angels ang unang panalo sa kanilang pagtutuos sa alas-4 ng hapon.
Sa men’s division, magtatagpo naman ang Vice Co. Blockbusters at Cignal HD sa alas-10 ng umaga at magtutuos ang PLDT Home Ultera at IEM Volley Masters sa alas-12 ng tanghali.
Ang Fighting Warays ay galing sa 25-17, 27-25, 21-25, 14-25, 15-13 panalo sa Petro Gazz noong Mayo 9, habang ang Perlas Spikers naman ay nagmula sa 1-1 win-loss performance sa road game noong Sabado at Linggo sa Tuguegarao City.
Unang tinalo ng Perlas Spikers ang Creamline, 22-25, 25-16, 25-23, 17-25, 15-11, noong Mayo 12, ngunit nabigo naman sa mga kamay ng Pocari Sweat, 25-15, 15-25, 18-25, 22-25, kinabukasan para sa three-way tie mula sa ikaapat hanggang ikaanim na puwesto kasama ang Pocari at Tacloban sa parehong 1-1 marka.
Ang magwawagi sa laban ng Tacloban at Banko-Perlas ay aabante sa top spot kasama ang Creamline at PayMaya High Flyers.
Sasandal ang Fighting Warays kina Thai imports Amporn Hyapha at Sasiwimol Sangpan at sa mga locals sa pangunguna nina reigning NCAA MVP Shola Alvarez, Jovielyn Prado, Heather Guino-o, Andrea Marzan, Regine Arocha at Kyle Negrito.
Itatapat naman ni coach Ariel de la Cruz ng Perlas Spikers sina import Jutarat Montripila ng Thailand at Kia Bright ng US at sa malaking suporta mula kina Amy Ahomiro, Sue Roces, Rysabelle Devanadera, Dzi Gervacio, liberos Gizelle Tan, Ella de Jesus at setter Fenela Emnas.
- Latest