Paymaya diretso sa ikalawang panalo
MANILA, Philippines – Ipinagpatuloy ng inspiradong PayMaya ang kanilang ratsada matapos pataubin ang nagdedepensang Pocari Sweat-Air Force, 25-20, 25-19, 25-22, para masungkit ang ikalawang sunod na panalo sa pagdayo ng 2018 Premier Volleyball League Season 2 Reinforced Conference sa People’s Gym sa Tuguegarao City kahapon.
Kahit sa sobrang init sa loob ng airconditioned gym ay hindi nagpatinag sina import Tess Rountree at Jerrili Malabanan at ipinakita pa rin ang matikas na laro para sa mga High Flyers at ipalasap sa Lady Warriors ang unang pagkatalo sa import-laden conference.
Umiskor ang Amerikanong si Rountree ng limang atake at nag-ambag naman ng tatlo si Malabanan para sa 25-20 bentahe ng PayMaya sa first set.
Mula doon tuluy-tuloy na ang magandang opensa at depensa ng tropa ni head coach Roger Gorayeb upang itala ang 25-19 kalamangan sa second set.
Umani ang 24-anyos na si Rountree ng 18 puntos kabilang na ang 16 atake at dalawang blocks, habang ang FEU Lady Tamaraws standout na si Malabanan ay nagdagdag din ng siyam na puntos para sundan kaagad ang kanilang naunang 25-8, 33-31, 25-20 panalo laban sa Tacloban Fighting Warays noong Mayo 6.
Bukod kina Rountree at Malabanan, tumulong din ng 8 puntos si Shelby Sullivan, lima naman mula kay Aiko Urdas at tatlo kay Celine Domingo, ang huli ay isang atake para tapusin ang third set sa 25-22.
“I think, we have a good game. We’re becoming a good team, we’re helping each other in practice. It’s really good playing here. It’s a good experience,” pahayag ni Rountree.
Pinamunuan naman ni Myla Pablo ang Pocari mula sa kanyang 12 puntos,.
Si American import Maddie Palmer ay umiskor lamang ng siyam na puntos at siyam din kay Jeanette Panaga at anim mula sa isa pang import na si Arielle Love.
“Dalawang magkasunod na laro, ‘yun ang concern ko. Sabi ko rin sa kanila, playing two games in a row tapos ang init pa sa Tuguegarao, hindi ano eh, hindi player-friendly. Alam naman natin ang temperature, tapos maglalaro ka dalawang sunod but nandito na kami we just have to follow,” sabi ni Gorayeb.
Samantala, hangad naman ni Gorayeb ang ikatlong sunod na panalo sa pagharap ng PayMaya kontra sa Creamline Cool Smashers ngayong alas-4 ng hapon matapos ang salpukan ng Banko-Perlas at Pocari sa alas-2.
- Latest
