Ginebra gigil na makatabla

MANILA, Philippines — Natutuwa si Tim Cone sa 95-87 panalo ng Barangay Ginebra laban sa nagdedepensang San Miguel sa Game Three noong Martes ngunit hindi pa rin kuntento ang two-time PBA Grand Slam champion coach.

Ayon kay Cone, marami pang mailalabas ang Gin Kings sa kanilang best-of-seven semifinals series ng Beermen para sa 2018 PBA Philippine Cup.

“We’re happy but we’re not satisfied. Hopefully, we can continue to play an A plus, plus game,” wika ni Cone sa pagharap ng Ginebra sa San Miguel sa Game Four ngayong alas-7 ng gabi sa Mall of Asia Arena sa Pasay City.

Hangad ng Gin Kings na maitabla sa 2-2 ang kanilang semifinals duel ng Beermen.

“We really have to be aggressive the whole game. We can’t be passive against this team,” wika ni Ginebra veteran point guard LA Tenorio na nagtala ng 18 points sa Game Three. “We have to contain their guards, of course June Mar and even their bench.”

Wala pa ring katiyakan kung kailan gagamitin ni Cone si seven-foot center Greg Slaughter na siya sana niyang itatapat kay 6’10 at four-time PBA MVP June Mar Fajardo ng San Miguel.

“I don’t know when Greg is gonna be back,” wika ni Cone kay Slaughter na kasalukuyang bumabangon mula sa isang sprained left ankle injury at hindi pa nakikita sa aksyon simula noong elimination round.

Samantala, pinagbayad ng PBA Commissioner’s Office si one-time PBA MVP Arwind Santos ng mul-tang P25,000 dahil sa negatibong komento niya sa officiating sa pagkatalo ng Beermen sa Game Three.

Ang P20,000 ay para sa statements na nakakasira sa PBA ng dating kamador ng Far Eastern University Ta-maraws habang ang P5,000 ay sa kanyang flagrant foul 1 kay Ginebra forward Japeth Aguilar.