Rondo alanganin

CHICAGO — Kung gusto ng Bulls na pahabain ang kanilang serye ng Boston Celtics ay kailangan nilang gawin ito na wala si guard Rajon Rondo.

Nagkaroon si Rondo ng fractured right thumb at sinabi ni Chicago coach Fred Hoiberg na hindi makakalaro ang backcourt catalyst sa Game 6 laban sa Boston.

Hindi rin tiniyak ng coach kung makikita sa aksyon si Rondo kung mapupuwersa ng Bulls ang Celtics sa Game 7.

“Nothing has changed as of now,” wika ni Hoiberg sa idinaos na conference call noong Huwebes.

Sinabi ni Hoiberg na si Rondo ay papalitan ni guard Isaiah Canaan sa kanyang posisyon sa ikalawang sunod na laro.

Tangan ng Celtics ang 3-2 bentahe sa kanilang first-round playoff series ng Bulls.

Matapos magkaroon ng injury si Rondo sa Game 2 ay tatlong sunod na panalo ang kinuha ng Boston.

“But just that’s the reality of the situation that we’re in right now,” wika ni Hoiberg. “It’s probably going to be that way the rest of the series.”

Naglista si Rondo ng mga averages na 11.5 points, 10.0 assists, 8.5 rebounds at 3.5 steals sa unang dalawang panalo ng Chicago sa serye nila ng Boston.