Premyong P125K nakataya sa apat na special races
MANILA, Philippines - Apat na special races ang magpapatingkad sa pagbubukas ng karera sa buwan ng Setyembre bukas sa Metro Turf sa Malvar, Batangas.
Walong karera ang nakaprograma sa una sa dalawang sunod na pista sa racing club na pag-aari ng Metro Turf Club at ang apat na special races na suportado ng MMTCI ay gagawin sa races one, two, four at seven.
Ang mga mananalo sa apat na karerang ito ay magkakaroon ng guaranteed purse na P125,000.00 bukod pa sa P10,000.00 para sa nanalong horse owner na ibibigay ng Philippine Racing Commission (Philracom).
Sa 1,400m paglalabanan ang mga special races habang ang ibang nalalabing karera ay sa 1,200m at 1,000m inilagay.
May tatlong special races din ang gagawin sa Miyerkules na sinahugan din ng isang 3YO and Above Maiden race.
Sa 1,200m distansya gagawin ang maiden race na ito na nilahukan ng siyam na kabayo kasama ang dalawang coupled entries. Ang mananalo rito ay mayroong P10,000 dagdag gantimpala.
Ang mga maglalaban-laban sa nasabing karera ay ang Grace Kelly, Victory Boots, Santong Kalapati, Security Gem, Gymnast at mga coupled entries Market Maker/Go Abbey Go at Little Kitty/Girl Of Fire.
Lahat ng mga nakaprograma ay balanseng binigyan din ng handicap para matiyak na magiging maganda at palaban ang mga magsisitakbong kabayo.
- Latest
