SI Manang naman ng mga sandaling iyon ay nakituloy sa isa niyang kamag-anak. Ipinagtapat niya sa mga ito ang nangyari sa pinaglilingkurang bahay na muntik na siyang mapatay ng babaing ka-live-in ng kanyang amo. Nakatakas lang siya kaya hindi natuloy ang balak sa kanya.
“Bakit hindi mo ireport sa mga pulis, Manang?’’ tanong ng kanyang pinsang lalaki.
“Ayaw kong malagay sa kahihiyan ang amo kong lalaki, pinsan.’’
“Pero muntik ka nang mapatay ng ka-live-in niya. Dapat magreklamo ka.’’
“Ang gusto ko, makausap nang personal ang amo kong lalaki. Ipagtatapat ko sa kanya ang lahat.’’
“May number ka ba niya?’’
“Nasa aking cell phone pero nasira na dahil ibinato ng ka-live-in nang mag-away kami. Nahuli kasi na isinusumbong ko siya.’’
“Problema ‘yan kung paano mo masasabi ang problema sa amo mo.’’
“Meron pa akong isang problema. Yung gardener namin ay nasa mansion pa at maaaring nasa panganib ang buhay. Maaaring patayin siya ng amo ko.’’
“Teka, teka, naguguluhan ako. Ano naman ang papel ng gardener at mukhang lumalawak ang problema.’’
“’Yung gardener e may relasyon sa ka-live-in ng amo ko. Pero nangyari iyon dahil sa pang-aakit ng ka-live-in ng amo ko. Nilason niya ang isip kaya ayun, naging biktima niya. Dahil dun maaaring mapatay siya ng amo ko dahil pinagtaksilan siya --- parang nagmistulang ahas na tinuklaw siya sa likod.’’
“Masalimuot pala ang problema mo Manang.’’
“Kaya nga naguguluhan ako. Hindi ko alam ang mga gagawin.’’
“Siguro, dapat mong unahing makausap ay ang amo mong lalaki. Siya lamang ang maaaring makapagpasya. Ipaliwanag mo sa kanya ang mga nangyari.’’
“Palagay ko tama ka, kailangang makausap ko sa lalong madaling panahon ang aking amo.’’
“Puntahan mo na siya ngayon din at baka may mangyari pang hindi maganda.’’
“Oo. Pupunta ako. Kailangang malaman ni Sir Nath ang lahat.”
Nagtungo si Manang sa mansion para makausap si Sir Nath.
Habang sakay ng dyipni, nagulat siya nang makita ang isang lalaki. Pinagmasdan niya. Hindi siya maaaring magkamali!
Si Alexis! (Itutuloy)