CEBU, Philippines — Kun nakabantay mo, mopatigbabaw gyud ang natural nga kalami sa isda kun presko gyud kini atol sa pagluto niini.
Alang sa dili mahilig og baboy ug manok, siguradong isda gyud ang padulngan ug tumpak na tumpak ang kaayohan nga makuha nato niini.
Usa na niini ang Omega 3 nga swak kaayo alang sa kasing-kasing. Suma pa sa marker32.com, aduna kini gitawag nga good cholesterol.
Sa dakbayan sa Sugbo, usa sa mga lugar nga nidalit og lamian nga sud-an mao ang Pasil, nga nidalit gyud og lamian nga larang.
Usa na sa nakapabantog sa maong lugar mao ang ilang linarang. Giila kini sa publiko nga Larangan sa Pasil-The Original! Usa gyud ko sa nagbaha nila nga customers nga magbalaik-balik og kaon dinhi.
Alas dos pa lang sa kadlawon, nagsugod na sa sila pagpamaligya.
Numero uno nilang nga customers mao ang mga gikan sa laag ug gikan sa inum nga nag hinam hinam nga mohigop og init nga sabaw human sa ilang mga laag.
Ambot og ngano basta matag panahong mohigop na ko sa sabaw sa ilang larang, mura’g dunay ko matagamtaman nga mura’g gatas.
Nagtimaan ang maong lasa nga lab-as gyud ang ilang isda. Nahimutang kini kilid sa Pasil Fish Market, perfect na kaayo ang imong kaon sa kadlawon. Bukas sila matag 1:30am hangtud 5:00am.
Sa kantidad lang nga P70.00, pwede na nimong ma-experience ang ka lami sa maong espesyal nga putahi.
Sa pag-anhi dinhi, taas-taasan lang ang atong pasensiya gamay kay daghan gyud ang maglinya ug maghuwat nga makakaon dinhi.
Kahibawo kong naghinam-hinam na mo dinha samtang nagbasa niini, unsa pay inyong gihuwat, dali na, mag- linarang sa Pasil na kita.