CEBU, Philippines — Napili na ang opisyal nga 12 ka finalists sa 40th Cebu Popular Music Festival nga mosikad karong Enero 2020.
Nahitabo ang lapad nga screening niini niadtong Sabado, September 7, 2019 didto sa University of the Visayas ..
Nasayran nga dili basta-basta ang pag-screen sa nagbaha nga entries gumikan kay niabot gyud kini og pipila ka oras.
Ang finalists naglangkob sa Salamat Cebu (Neil Salarda), Sugbuanong Musika (Frenyx Tarongoy), Duha Nata (Russel Alegado), Bakho Sa Kamingaw (Ritcher Alegado), Agalon Kong Strikto (Hernando Maniwan) ,Sugid Kang Maria (Joseph Gara), Abby (Barry Villcarillo), IPTU (Clefford Ray Duran), Estudyanteng Tambay (Mateo Barulo Jr.), Pailob Lang ( Fred Fuentes Monternel), Ayaw Jud (Floramie Mamulo), ug Gugma Sa Kasulatan ( Jay Arr Librando).
Ang mga nag-screen sa entries mao sila si Obette Del Rosario,Baby Condeno, Sam Costanilla, Roy Cesar Caballero ,Britz Briones, Preciosa Bacalso, Maria Donna, DJ Jacky G. ug DJ Rick sa MOR 97.1 .
Ang Cebu Pop maoy tinuig nga halad sa kongresista sa unang distrito sa Sugbo nga si Atty. Eduardo R. Gullas isip pagpadayag sa iyang dakong gugma ngadto sa Balaang Bata nga si Señor Santo Niño ug agig pag-abag usab sa paglambo pa sa Sugbuanong musika.
Catriona pasok sa advocacy film
Gi-post ni Miss Universe 2018 Catriona Gray sa iyang Instagram account ang usa ka film teaser kun diin makita ang eksena nga naglakaw-lakaw siya sa kadalanan.
Pipila ka statements nga gipalutaw niini naglangkob sa "you're not deserving," "not good enough,"ug "insecure."
Naghinamhinam na si Catriona nga makakita ang mga tawo niini sanglit daghan matud pa ang maka-relate niini.
Gibalibaran ni Lloydie
Niulbo karon ang tsika nga matud pa imbitado si John Lloyd Cruz sa ABS-CBN Ball 2019 apan iyaha kining gibalibaran.
Una na nga nigawas ang taho nga mao usab kini ang gibuhat ni Lloydie sa miaging tuig.
Giingong nag-enjoy si Lloydie sa iyang kinabuhi nga layo sa kamera.