Kapuso stars magbaha sa Sugbo
CEBU, Philippines – Gipaabot nga powerhouse line-up sa mga artista ang idalit sa Kapuso Network alang sa mga Sugbuanon nga magsugod karong adlawa.
Ang mga bida sa GMA primetime drama series Kara Mia nga sila si Barbie Forteza ug Mika dela Cruz gikatakdang mohatag og kalingawan diha sa Gaisano Grand Mall- Jai Alai sa alas 3 sa hapon. Makig-uban usab kanila ang mga guwapong aktor nga sila si Jak Roberto ug Paul Salas.
Dugang mga artista ang molugwa diha sa Ayala Center Cebu karong alas 6 gabii alang sa Kapuso Fiesta. Kini naglangkob nila ni Kyline Alcantara ug Therese Malvar nga bitoon sa upcoming drama series nga Inagaw na Bituin.
Samtang ugmang adlawa, Enero 18, 2019, motikang sa Sugbo ang mga bitoon sa Cain At Abel nga sila si Primetime King Dingdong Dantes ug Kapuso Drama King Dennis Trillo .
Mang-hugyaw sila ugma sa ilang Cebuano fans diha sa Gaisano Grand Fiesta Mall –Tabunok sa alas 3 sa hapon. Makig-uban usab kanila ang ilang co-stars sa maong serye nga sila si Solenn Heussaff ug Sanya Lopez.
Pagkahuman sa maong show, moderetso na sila sa Robinson’s Galleria Cebu alang sa laing Kapuso Fiesta sa alas 6 sa gabii.
Karong Domingo, Enero 20, mosakay sa GMA Float sila si Dingdong, Solenn, Sanya, ug Dennis atol sa Sinulog Grand Parade.
Samtang ang GMA Cebu modalit usab og live coverage sa parade ug nag-ulohan kini og “Pit Senyor: The Balitang Bisdak Special Live Coverage” kauban sila si Bobby Nalzaro, Alan Domingo, ug Cecile Quibod-Castro. Naa usab ang Balitang Bisdak correspondents nga sila si Chona Carreon, Lou Ann Mae Rondina, ug Nikko Sereno. Makita usab kini sa livestream sa GMA Regional TV’s official website nga www.gmanetwork.com
- Latest