CEBU, Philippines — Wala makapugong ang singer nga si KZ Tandingan sa pagtulo sa iyang luha atol sa katapusang bahin sa iyang concert niadtong Sabado sa gabii sa Waterfront Cebu City Hotel and Casino.
Tsika pa sa usa sa mga agent sa ticket sa maong concert nga si Adrian Diongzon nga Sabado sa buntag, gitawagan siya sa iyang ig-agaw nga taga Cornerstone nga may naghupot sa career ni KZ, ug nipahibalo kini nga nakanselar ang mga flight gikan sa kaulohan paingon dinhi sa Cebu gumikan sa kakulian sa Ninoy Aquino International Airport hinungdan nga dili katikang sa Cebu ang glam team, backup singers ug ang banda nga maoy opisyal nga kauban ni KZ sa iyang concert.
Naabot sa KZ niadtong Biyernes aron maka-relax apan nakulbaan kini og maayo sa dihang dili makaapas kaniya ang team sa iyang concert.
Dugang pa ni Adrian nagkapuliki gyud siya og pangita og banda aron maoy moduyog sa maong concert.
“After lunch , nakakita gyud mi og banda, ug gi-rehearse dayon sila og alas singko,” suma pa ni Adrian.
Dugay pa gyud naabot ang iyang mga costume , samtang ang Cebuana backup dancers niya, na-stranded usab didto sa kaulohan .
“Maayo gani, kay nakakita ra mi og upat ka dancers pagka-hapon niana, “ dugang pa niya.
Bisan pa man sa maong mga pagsulay nga iyang naagian, nagmalampuson gyud ang maong concert hinungdan nga nakahilak gyud og taman si KZ gumikan kay wala niya damha nga nahatagan dayon og kasulbaran ang kinalit nga mga problema .
“Bilib gyud ko kang KZ, kay na-manage ra gyud niya og tarong ang iyang concert bisan paman nga duna’y mga kakulian. Grabe na gyud ang iyang kakulba ato, dunay higayon nga plano sa production nga mag-minus one nalang, pero may gani kay napangitaan gyud og paagi. Kung uban pa to nga artista, ni-surrender nato,” matud pa ni Adrian.