Oh la la Bianca…

CEBU, Philippines - Facebook post sa netizen nga si Pao Pao Nueve kagahapon mao nga kun ingon pa lamang unta niini ang lawas ni Bianca Manalo niadtong siya maoy pambato sa Pilipinas sa Miss Universe pageant niadtong 2009, siya unta maoy mubuak sa hataas nga huwaw nga natagamtam sa nasud sa natad sa international pageant. Kahinumduman nga si Venus Raj maoy nibuak sa maong huwaw sanglit human siya nahimong 4th runner-up niadtong 2010, kanunay na nga “pasok sa banga” ang Pilipinas sa Miss Universe pageant.

Nausab ang tonada

Nausab ang tonada sa inahan ni Kathryn Bernardo nga si Min, kinsa unang gidudahan nga ang Jadine (James Reid ug Nadine Lustre) loveteam ang gipadungdungog niini niadtong Lunes sa gabii sa iyang tweet nga “nanggagata.” Karon niingon si Mommy Min nga magtinabangay matud pa silang tanan sanglit managsama ra sila nga mga kapamilya, busa suportahan matud pa ang tanang show.

Demotion?

May mga nikisikisi nganong sa Kapamilya Gold o sa panghapon nga timeslot ibutang ang umaabot nga teleserye ni Julia Montes nga mao ang “Doble Kara.” Suma pa sa mga atribida, dili kini makatarunganon para kang Julia sanglit dako na kini og natampo sa primetime. 

Tiguwang na’s Gerald uy!

Daghang mga nagyawyaw nganong si Gerald Anderson matud pa ang gihimong ka-triangle sa LizQuen (Liza Soberano ug Enrique Gil) loveteam sa umaabot nilang pelikula sa Star Cinema. Ang mga chikadora niingon nga tiguwang na matud pa kaayo si Gerald aron maoy ibutang sa maong pelikula. Apan nasayran nga tinuyo matud pa sanglit sa istorya, unang magkauyab sila si Liza ug Gerald, diin ang nauwahi matud pa maoy musuporta sa nahauna gikan sa kawad-on. Apan makaila ni Liza si Enrique ug mahigugma siya niini, ug maglisud siya pagbuwag kang Gerald gumikan sa iyang utang kabubut-on.

Bulahan ka Jen!

Mulingkod isip usa sa mga hurado si Jennylyn Mercado sa subling pagbalik sa real-artista search Starstruck sa GMA7 sunod bulan. Kahinumduman nga si Jennylyn ug Mark Herras ang mga mananaog sa unang batch sa Starstruck mga pito na ka tuig ang nilabay.

Dakong binalulog suma pa ni Maria!

Binalulog! Kini ang reaksyon sa kanhi Japanes porn star nga si Maria Ozawa kinsa maoy gibasul sa ubang netizens nganong napunitan si Mariel Rodriguez niadtong Huwebes.

Kahinumduman nga niadtong Miyerkules, niatras si Robin Padilla sa Metro Manila Film Festival entry unta nila ni Maria nga nag-ulohan og “Nilalang” aron maatiman niya ang delikado nga pagmabdos ni Mariel og triplets.

Wala nakauyon niini si Maria ug nihingan kang Robin nga “unprofessional” gumikan kay 10 na lamang matud pa ka adlaw sa dili pa magsugod ang shooting, usa pa niatras sa maong proyekto nga unta nasayud na man siyang daan nga mabdos si Mariel.

Pagka Huwebes nakumpirma nga napunitan si Mariel sa ikaduhang higayon karon lamang tuiga. Una siyang napunitan niadtong Marso.

May mga netizen nga nibasol kang Maria sa nahitabo, hinungdan nga gihulagway kini ni Maria nga binalulog. Sayup matud pa nga siya maoy basulon sa nahitabo.

“Blaming me for the miscarriage is wrong”, depensa ni Maria.

May usa pa ka netizen nga isog kaayo nga nikomentaryo gyud sa instagram account ni Maria ug nipasangil niini nga maoy hinungdan sa pagkapunit sa  triplets unta nila ni Robin ug Mariel. Dinhi niingon si Maria nga dili angayan nga siya maoy basulon sanglit dili man siya maoy adunay control sa mga panghitabo.

“Why do you sound like as if I wanted that to happen? You’re such a crazy person... and cold hearted”, ni Maria pa.

Nasayran nga si Cesar Montano na maoy muhulip kang Robin para sa Nilalang.