CEBU, Philippines - Ang paghatag og gasa ngadto sa atong mga minahal sa atong kinabuhi nagpasabot nga atong gipakita ang atong “feelings”, “love” ug “appreciation”.
Pinaagi sa paghatag og regalo, imong gipa-feel ang usa ka tawo nga espesyal sila sa imong kinabuhi ug mapasalamaton kaayo sila kanimo gumikan kay nakahatag ka og tam-is nga pahiyom bisan sa ingon niini lang nga pamaagi.
Base sa pulso sa kadaghanan, makatampo sa pagpalig-on sa usa ka relasyon ang pagtunol og gasa.
Apan angayan nga huna-hunaon permi sa kadaghanan nga dili angayan kuwentahon ang presyo. Bahala’g barato basta kinasing-kasing lang ang imong paghatag.
Bisan unsa kini ka gamay, apan seguradong dili gyud ka malimtan sa gihatagan nimo niini.
Ang regalo matawag usab nga “token of love” sanglit duna kini elemento sa surpresa nga makagaan sa gibati sa usa ka tawo.
Ako lang nga klarohon nga dili pinugsanay ang regalo ug usa sa alternatibo nga pagpakita og gasa ngadto sa imong isigkatawo mao ang pagpakita kanila sa imong respeto ug matam-is nga gugma ngadto kanila.
Kung dunay respeto ang matag usa kanato, seguradong mopatigbabaw gyud ang kalinaw nga maoy gipangita sa katawhan.
Huna-hunaa mga ka-bonding nako nga Banat News INners, ang labing importante sa pagsaulog sa Pasko mao nga magmalipayon kitang tanan ug magtinabangay sa usa’g-usa alang sa kahiusahan sa tanan.
(Paminawa si DJ Churva, Lunes-Biyernes , 6-9am pinaagi sa programang Morning Starsweep sa 95.5 Star FM)